KFOR-i ka nisur një proces gradual për ndryshimin e pranisë së tij të përhershme në Urën e Ibrit, duke pritur një zhvillim të ngjashëm edhe në Manastirin e Deçanit.
Gazetarja Altiana Zogaj, e cila raportoi nga “Edicioni Special” i Klan Kosovës, njoftoi se ky proces po realizohet në bashkëpunim me institucionet e Kosovës, Policinë e Kosovës dhe EULEX-in.
Ajo tha se ky ndryshim ka si qëllim përmirësimin e situatës së sigurisë në Kosovë dhe optimizimin e pozicionimit të trupave. Sipas KFOR-it, ky vendim po implementohet në koordinim të plotë me autoritetet lokale dhe organizatat ndërkombëtare.
Zogaj po ashtu theksoi se, megjithëse do të ketë një reduktim në praninë në urën kryesore mbi lumin Ibër, KFOR-i do të vazhdojë të mbetet aktiv në veri dhe jug të Mitrovicës, duke qenë i gatshëm të reagojë ndaj çdo zhvillimi të mundshëm.
Reduktimi i pranisë së KFOR-it në Urën e Ibrit është kundërshtuar nga Lista Serbe, e cila ka kërkuar një takim urgjent me komandantin e KFOR-it, Ozkan Ulutash.
Ndërkohë, disa qytetarë e kanë mirëpritur këtë vendim, ndërsa të tjerë janë shprehur të shqetësuar, duke e parë praninë e KFOR-it si një garanci për siguri.
You must be logged in to post a comment Login