Një vajzë 14-vjeçare, e gjetur e vdekur në një park në jug të Uellsit, dyshohet se ka vdekur nga plagë të shumta me thikë. Këto detaje janë bërë të njohura gjatë një seance hetimore.
Vajza, Lilly Anne Jones, ishte raportuar e zhdukur më 20 qershor. Dy ditë më vonë, trupi i saj u zbulua në zonën e Duffryn Park, në Blaina.
Gjatë hapjes së hetimeve të hënën në Gjykatën e Koronerit në Gwent, u bë e ditur se Lilly u gjet pak pas orës 22:00 në një zonë pyjore afër një klubi bowling me plagë në gjoks dhe në qafë. Ajo u shpall e vdekur në orën 22:45 më 22 qershor, sipas informacioneve të paraqitura në gjykatë, siç raporton Skynews.
Koronerja e lartë Caroline Saunders informoi gjykatën se, pas autopsisë që u krye nga Dr. Richard Jones, shkaku i vdekjes ishte identifikuar si “plagë të shumta me thikë në qafë dhe trup”.
Seanca u shty dhe është caktuar një datë provizore për hetimin e plotë më 6 prill 2027. Blaina ndodhet rreth 18 milje në veri të Cardiffit, në luginat e Uellsit të Jugut.
Ngjarja vjen pas një arrestimi, ku një djalë 14-vjeçar, identiteti i të cilit nuk mund të bëhet publik për arsye ligjore, është akuzuar për vrasjen e Lilly-t. Ai u paraqit në gjykatë më 29 qershor, ku nuk pranoi fajësinë ndaj akuzës dhe për momentin është lënë në paraburgim deri në paraqitjen e radhës.
Gjykatësja Tracey Lloyd-Clarke, Recorder e Cardiffit, ka caktuar fillimin e gjykimit më 23 nëntor, i cili pritet të zgjasë katër javë.
Be the first to comment