Komandanti i KFOR-it, Ozkan Ulutash, ka deklaruar se pritet nga Serbia të kontribuojë në sigurimin e llogaridhënies për sulmet e ndodhura në vitin 2023 në Kosovë.
Ai theksoi se situata në Banjskë përbënte një sfidë serioze për KFOR-in, por NATO-ja reagoi menjëherë. “Ngjarjet në Banjskë në vitin 2023 ishin padyshim një sfidë që kërkonte një reagim të shpejtë dhe vendimtar,” u shpreh Ulutash në Info Magazine të Klan Kosovës. Ai shtoi se përgjigja e NATO-s çoi në forcimin më të madh të kapaciteteve të KFOR-it në më shumë se një dekadë.
Pavarësisht sfidave të shumta që KFOR-i ka pasur gjatë 27 viteve të tij, Ulutash theksoi se forcat paqeruajtëse kanë dëshmuar vazhdimisht aftësinë për të zbatuar mandatin e OKB-së paanshmërisht. “Prioriteti ynë është të sigurojmë që prania jonë operative në terren të mbetet e përshtatshme për detyrën,” theksoi ai, duke nënvizuar angazhimin e çdo pjesëtari të KFOR-it.
Komandanti informoi se KFOR-i komunikon rregullisht me Forcat e Armatosura të Serbisë, duke pritur mbështetje nga ato për sigurimin e llogaridhënies për sulmet e 2023-ës. “KFOR-i mban një komunikim të rregullt dhe transparent me Forcat e Armatosura të Serbisë në të gjitha nivelet,” shpjegoi ai.
Ulutash njoftoi se do të vizitojë së shpejti Beogradin për të takuar shefin e Shtabit të Forcave të Armatosura të Serbisë, gjeneralin Mojsilloviq. Ky do të jetë takimi i tij i pestë me gjeneralin gjatë këtij mandati. Ai vlerësoi bashkëpunimin e zhvilluar me gjeneralin, duke përmendur rëndësinë e transparencës dhe besimit të ndërsjellë për ruajtjen e stabilitetit rajonal.
Së fundi, Ulutash siguroi se siç ka theksuar Sekretari i Përgjithshëm i NATO-s, organizata pret mbështetje nga Serbia për sigurimin e llogaridhënies në lidhje me sulmet e paarsyetueshme në Kosovë.
Be the first to comment