Një predhë godet një cisternë nafte afër Ngushticës së Hormuzit

Të hënën, një anije cisternë u godit nga një predhë e panjohur ndërsa lundronte pranë Ngushticës së Hormuzit.

Ky incident ndodhi disa orë para nisjes së presidentit të SHBA-së, Donald Trump, për në samitin e NATO-s në Ankara, Turqi.

Sipas raportimeve nga Organizata e Mbretërisë së Bashkuar për Tregtinë Detare (UKMTO), nuk ka pasur viktima, por janë regjistruar dëme mjedisore. UKMTO tha gjithashtu se anija u godit gjatë lundrimit drejt jugut dhe u bëri thirrje anijeve që të kalojnë me kujdes në atë zonë, ndërsa autoritetet po kryejnë hetime për incidentin.

Ky ngjarje ndodhi pranë një prej rrugëve më të rëndësishme për transportin e energjisë, pavarësisht një armëpushimi që është në fuqi mes Shteteve të Bashkuara dhe Iranit.

Axios raportoi, duke cituar dy zyrtarë amerikanë të paidentifikuar, se Irani ka gjuajtur të paktën dy raketa ndaj anijeve tregtare dhe se një anije tjetër gjithashtu ka pësuar goditje. Këto pretendime ende nuk kanë mundur të verifikohen në mënyrë të pavarur, ndërsa Pentagoni nuk ka dhënë një koment të menjëhershëm.

Megjithatë, lundrimet e anijeve tregtare kanë rinisur nëpër Hormuz, por rreziqet e sigurisë mbeten të larta në këtë zonë dhe në ujërat afër Jemenit, ku tregtarët detarë po përballen vazhdimisht me sulme në ditët e fundit.