Si të mbroheni nga mushkonjat gjatë ditëve të nxehta?

Moti aktual në Britani po krijon kushte të favorshme për një rritje të konsiderueshme të mushkonjave, ka paralajmëruar një eksperte. Mojca Kristan, asistente profesore në entomologjinë mjekësore në London School of Hygiene and Tropical Medicine (LSHTM), thekson se disa lloje mushkonjash që mund të transmetojnë sëmundje të rënda, si ethet dengue dhe Zika, mund të shfaqen në Mbretërinë e Bashkuar brenda pak vitesh, për shkak të ndryshimeve klimatike.

Kristan thekson se kushtet e motit në Britani janë ideale për mushkonjat. Ato preferojnë ngrohtësinë dhe ujin e ndenjur, ku vendosin vezët e tyre. “Për t’u mbrojtur nga pickimet, është e rëndësishme të përdorni repelentë ndaj insekteve dhe të mbuloni lëkurën me mëngë të gjata. Po ashtu, është e këshillueshme të vishni çorape në mbrëmje, pasi mushkonjat kanë tendencë të pickojnë rreth kyçeve të këmbëve,” thotë ajo.

Sipas Kristan, disa specie invazive që janë në gjendje të transmetojnë viruse si dengue, chikungunya dhe Zika, përfshijnë Aedes albopictus (mushkonja tigër aziatike) dhe Aedes aegypti (mushkonja egjiptiane). Aktualisht, këto lloje nuk janë të pranishme në Mbretërinë e Bashkuar, megjithëse janë zbuluar vezë të Aedes albopictus atje.

Megjithatë, disa nga këto viruse, si dengue dhe chikungunya, tashmë kanë qenë të pranishme në Evropë, veçanërisht në rajonin e Mesdheut. Studime të modelimit sugjerojnë se, deri në vitin 2060, klima në Londër dhe zonat përreth ka gjasa të krijojë kushte që favorizojnë transmetimin e qëndrueshëm të etheve dengue.