Një burrë, i identifikuar si Danny Tomlinson, 47 vjeç, ka përjetuar probleme serioze pas një udhëtimi në Turqi për trajtim dentar. Ai thotë se tani dhëmbët e tij po bien dhe se mund të përballet me shpenzime riparimi që arrijnë deri në 40 mijë euro.
Tomlinson, i cili punon si shtrues pllakash në Essex, nuk ishte i kënaqur me pamjen e dhëmbëve të tij. Ai i përshkruan ato si të shtrembër, të nxirë dhe me njolla. Fillimisht, ai iu ofrua një çmim prej 3,500 euro për një set të plotë kurorash dentare, ndërsa pas instalimit të një implanti, kostot u rritën në 3,900 euro.
Pas kthimit në Britani, problemet e tij filluan të shfaqen. Ai pranon se nuk kishte bërë kërkime paraprake, duke vepruar me impuls. “Nuk doja të shikoja video apo të informohesha për pasojat,” shpjegoi ai.
Tomlinson udhëtoi në Turqi në dhjetor të vitit 2020 dhe fillimisht ishte i kënaqur me rezultatet, duke besuar se trajtimi do të zgjaste pesë deri në shtatë vjet. Megjithatë, ai vuri re se dhëmbët e poshtëm po lëviznin.
Gjashtë muaj pas trajtimit fillestar, ai u kthye në klinikën turke dhe deri tani ka bërë nëntë udhëtime të tjera për të zbuluar se problemet kanë vazhduar të shtohen. Ai nënvizon se klinika nuk ka ofruar shpjegime të qarta dhe e ka dërguar atë në shtëpi pas procedurave.
Në vizitën e tij më të fundit, një muaj më parë, mjekët i thanë se disa dhëmbë ishin të liruar dhe i ofruan një trajtim të ri që do t’i kushtonte rreth 12 mijë euro. Gjithashtu, një dentist në Britani kishte paralajmëruar më parë se të gjitha kurorat në nofullën e sipërme, si dhe katër dhëmbë në pjesën e poshtme, do të duhej të zëvendësoheshin.
Tani, Danny thotë se ka vështirësi në të ushqyer dhe jeton me frikën e vazhdueshme se dhëmbët e tij mund të bien plotësisht. Ai shprehet se nëse do të shkonte te një dentist britanik me planin e tij për të gërryer të gjithë dhëmbët natyralë, do t’i ishte thënë të mos e bënte këtë.
“Pendimi im është i madh. Nuk duhej ta kisha bërë kurrë këtë trajtim,” përfundon ai.
Be the first to comment