Aksident i rëndë në rrugën Lushnjë-Tiranë, benzi përplas për vdekje çiklistin

Një aksident i rëndë me pasoja fatale ka ndodhur pak para mesnatës në autostradën Lushnjë – Tiranë, pranë urës mbi lumin Shkumbin.

Sipas informacionit nga A2, një automjet i markës “Benz” ka goditur një person që po lëvizte me biçikletë. Përplasja ka rezultuar fatale, duke i shkaktuar viktimës vdekjen në vendngjarje.

Të dhënat e para sugjerojnë se drejtuesi i biçikletës ka qenë duke ecur në mes të karrexhatës. Ndërsa drejtuesi i automjetit ka tentuar të devijojë, nuk ka arritur dot të shmangë përplasjen fatale.

Viktima është identifikuar si Taulant Veliu, rreth 30 vjeç, dhe banonte në fshatin Grabjan, Njësia Administrative Grabjan, Bashkia Divjakë.

Policia Rrugore ka bllokuar përkohësisht kahun e lëvizjes drejt Tiranës për të kryer veprimet procedurale dhe për të dokumentuar ngjarjen plotësisht.

Grupi hetimor i Policisë është duke punuar për zbardhjen e rrethanave dhe shkaqeve që çuan në këtë aksident tragjik.