"Jam i kthjellët dhe po e jetoj plotësisht jetën time,” shpalli Xhimi Loga, 26 vjeçar nga Durrësi, gjatë një intervistë në A2 CNN, ku ndau historinë e tij të varësisë nga lëndët narkotike.
Loga tregoi se filloi përdorimin e marihuanës në moshën 14-vjeçare dhe pas 12 vitesh arriti të shkëputej prej saj. Ai shprehu falënderim për mundësinë që i ofrohet, duke theksuar rëndësinë e ndarjes së historisë së tij me të rinjtë. Sipas tij, shumë të rinj nuk e kuptojnë se ky është një hapi i gabuar, por përvoja e tij e ka bërë të vuajë ndjeshëm. Ai tregoi se aktualisht është në një periudhë rikuperimi, duke e përjetuar ende vështirësinë e kohëve të para pas ndalimit.
Loga përshkroi se kontakti i tij i parë me drogën erdhi nga një person më i madh në moshë, i cili e udhëzoi se marihuana nuk kishte pasoja të dëmshme. Kurioziteti tipik i adoleshentëve, së bashku me ndikimet e shoqërisë, e shtynë atë të eksperimentonte. Megjithatë, shumë shpejt përdorimi u shndërrua në varësi.
Ai sqaroi se në atë moshë adoleshentët priren të provojnë gjëra të reja. Loga tha se individi që e prezantoi me marihuanën ishte rreth 30 vjeç, dhe i kishte thënë se droga ishte e padëmshme. Ai e pranoi se pasojat ishin shumë të rënda dhe e kanë shoqëruar vazhdimisht.
Sipas tij, droga kishe ndryshuar rrënjësisht jetën e tij, duke i humbur interesin për shkollën, sportin dhe komunikimin me familjen. Ai gjithashtu filloi të gënjente dhe madje të vidhej nga prindërit për të siguruar lëndën narkotike.
Loga shpjegoi se humbi çdo interes dhe dëshirë për gjërat e mira. Ai theksoi se do të kishte dashur të kishte zgjedhur një rrugë tjetër, duke përmendur shokët e tij që ndërtuan karrierë si sportistë. Të humbash vite të tëra për shkak të varësisë ishte për të një përvojë e dhimbshme.
Gjatë viteve të konsumit, ai përjetoi probleme serioze psikologjike, episode paranoje dhe situata që e vunë në rrezik. Sipas tij, kishte tentuar edhe më parë të lërë drogën, por nuk kishte qenë i vendosur si këtë herë.
Loga e përshkroi varësinë si diçka që kthehet shpejt nga kurioziteti në varësi, dhe theksoi se është e vështirë të ndalosh, pasi logjika humbet. Ai shprehu se ndjehej se perspektiva e tij për jetën ishte e deformuar dhe se kishte rënë në botën e paranojës.
You must be logged in to post a comment Login