Lëvizja Revolta zhvilloi sot një aksion protestues para Ministrisë së Punëve të Brendshme, duke kërkuar më shumë transparencë në procesin e shqyrtimit të aplikimeve për shtetësi të Republikës së Kosovës.
Gjatë protestës, aktivistët vendosën pankarta në mburojat e sigurisë para ndërtesës së ministrisë, për të shprehur pakënaqësinë e tyre ndaj asaj që e quajnë mungesë të informimit institucional për aplikuesit.
Gazetarja e Klan Kosovës, Endrita Bajrami, raportoi nga vendi i ngjarjes, duke sjellë detaje mbi kërkesat dhe mesazhet e protestuesve. Ajo theksoi se aksioni simbolik përfundoi para hyrjes kryesore të Ministrisë së Punëve të Brendshme. Protestuesit shprehën shqetësimin e tyre për mungesën e transparencës rreth aplikimeve për shtetësi, duke përmendur ligjin që hyri në fuqi muajin e kaluar.
Pjesëmarrësit në protestë kërkuan informacione mbi numrin e aplikimeve për shtetësi, pasi kishin insistuar për përgjigje nga Ministria e Punëve të Brendshme, por nuk kishin marrë ende asnjë informacion.
Bajrami raportoi gjithashtu se protestuesit kishin vendosur pankarta pranë Ministrisë dhe se zyrtarët policorë ndërhynë duke i larguar ata nga hapësirat e objektit. Gjatë kësaj ndërhyrjeje, një nga protestuesit, me inicialet R.K., u shoqërua në stacionin policor.
Ajo informoi se dy zyrtarë policorë prisnin protestuesit pas përfundimit të aksionit, dhe dy nga ta u ofruan në mënyrë të veçantë ndaj R.K., duke kërkuar që ai të ikte me ta, pa dhënë shpjegime për arsyet e kësaj ndërhyrjeje.
Be the first to comment