Një operacion i realizuar nga Policia e Kosovës në bashkëpunim me Prokurorinë Themelore në Prizren ka përfunduar me arrestimin e dy personave të dyshuar për veprën penale të fajdesë. Ndër ta është edhe biznesmeni i njohur nga Suhareka, Habib Tafaj.
Burime të besueshme tregojnë se hetimet lidhen me ngjarje që datojnë që nga viti 2021. Të dyshuarit, Habib Tafaj dhe Burim Kuqi, akuzohen se kanë ushtruar presion ndaj viktimave për të përfituar nga veprimtaria e paligjshme e fajdesë.
Sipas dokumentacionit hetimor, viktimat L. S. dhe M. S. dyshohet se janë detyruar të veprojnë në dëm të pasurisë së tyre, duke pësuar dëme materiale si rezultat i veprimeve të dyshuarve.
Më 5 qershor 2026, Sektori Rajonal i Hetimeve në Prizren, në koordinim me Prokurorinë Themelore, ka realizuar arrestimin e të dyshuarve dhe ka kryer veprime të shumta për sigurimin e provave.
Pas intervistimit, Prokurori i Shtetit ka vendosur që të ndalojë Burim Kuqin për 48 orë, ndërsa Habib Tafaj është liruar në përputhje me procedurat ligjore.
Rasti është regjistruar për veprën penale "Fajde", ndërsa hetimet vazhdojnë.
Shënim: Personat e përmendur në këtë artikull prezumohen të pafajshëm derisa fajësia e tyre të provohet me një vendim të formës së prerë nga gjykata.
You must be logged in to post a comment Login