Një punëtor i Korporatës Energjetike të Kosovës (KEK), Arbenit Ahmeti, ka humbur jetën sot pas një aksidenti të rëndë në vendin e punës.
Sipas informacioneve të para, gjatë transportimit dhe zhvendosjes së kabllove 6 kV, ai dyshohet se ka rënë në kontakt me tensionin elektrik.
Pas ngjarjes, KEK-u njoftoi se janë ndërmarrë menjëherë veprime emergjente dhe Ahmeti është dërguar për trajtim mjekësor në Ambulancën e Obiliqit.
Megjithatë, pavarësisht përpjekjeve të stafit mjekësor, ai nuk ka arritur të mbijetojë nga lëndimet e marra.
Korporata Energjetike e Kosovës ka shprehur ngushëllime për familjen e të ndjerit, si dhe për të afërmit dhe kolegët e tij. “KEK-u shpreh ngushëllimet më të sinqerta familjes Ahmeti, të afërmve, kolegëve dhe të gjithë atyre që e njohën të ndjerin,” thuhet në njoftim.
Ndërkohë, organet kompetente kanë nisur trajtimin e rastit, ndërsa rrethanat e sakta të aksidentit pritet të sqarohen përmes procedurave përkatëse.
Në fund, KEK-u ka dërguar një mesazh për të ndjerin: “I përjetshëm qoftë kujtimi për Arbenitin.”
Be the first to comment