Prokuroria Speciale e Republikës së Kosovës, në bashkëpunim me Policinë e Kosovës dhe Institutin e Mjekësisë Ligjore, ka njoftuar se gjatë gërmimeve dhe ekshumimeve në Zubin Potok janë gjetur mbetje kockore që dyshohet se u përkasin të paktën 23 individëve.
Sipas një komunikate të përbashkët, gjetja ka qenë e konfirmuar të mërkurën nga ekipet e mjekësisë ligjore. Identifikimi i plotë i mbetjeve do të realizohet pas përfundimit të ekzaminimeve mjeko-ligjore dhe procedurave përkatëse.
Në komunikatë theksohet: “Prokuroria Speciale e Republikës së Kosovës, në bashkëpunim me Policinë e Kosovës dhe Institutin e Mjekësisë Ligjore, njofton opinionin publik se, në kuadër të veprimeve të gërmimit dhe ekshumimit në rastin në Zubin Potok, është konfirmuar gjetja e mbetjeve kockore. Gjatë këtyre veprimeve, ekipet e Institutëit të Mjekësisë Ligjore kanë identifikuar mbetje kockore, të cilat dyshohet se u përkasin së paktën 23 individëve.”
Aktualisht, për këtë rast po hetohen tre persona, J.R., M.J. dhe M.B., nën dyshimin për kryerjen e veprës penale “Krime lufte kundër popullsisë civile”. Të tre ndodhen në paraburgim.
You must be logged in to post a comment Login