Përpjekjet diplomatike për të gjetur një zgjidhje mes Shteteve të Bashkuara dhe Iranit kanë hyrë në një fazë të re. Palët kanë filluar shkëmbimin e drafteve për një marrëveshje të mundshme.
Zëdhënësi i Ministrisë së Jashtme të Katarit, Majed al-Ansari, njoftoi se është përgatitur një tekst paraprak i marrëveshjes, i cili është dërguar për shqyrtim nga të dyja palët. Këtë informacion e raportoi agjencia Reuters.
Katari dhe Omani po luajnë rolin e ndërmjetësuesve mes Uashingtonit dhe Teheranit, megjithëse deri tani nuk ka pasur kontakte të drejtpërdrejta mes dy vendeve. Sipas autoriteteve në Dohas, synimi kryesor është arritja e një marrëveshjeje të përkohshme, që do të kthente SHBA-në dhe Iranin në tryezën e negociatave dhe do të ndihmonte në uljen e tensioneve në rajon.
Në këtë kontekst, presidenti amerikan Donald Trump ka theksuar se SHBA-ja po i ofron Iranit mundësi për një zgjidhje diplomatike, para se të ndërmarrë masa të tjera.
Megjithatë, sulmet ndaj anijeve tregtare dhe mosmarrëveshjet për lirinë e lundrimit, tarifat dhe kontrollin e ngushticës së Hormuzit vazhdojnë të mbesin pengesa të mëdha për arritjen e një marrëveshjeje përfundimtare.
You must be logged in to post a comment Login